კომპანია ბახვი ჰესის სოციალური პროგრამა ორიენტირებულია გრძელვადიან ჭრილში ეკონომიკური სარგებლის მომტან პროექტებზე. სწორედ ამ მხრივ, ბახვი ჰესი უკვე მეორე წელია თანამშრომლობს USAID-ის ეკონომიკური უსაფრთხოების პროგრამასთან. აღნიშნული პარტნიორობის ფარგლებში, გურიის რეგიონში მნიშნველოვანი ინიციატივა ხორცილედება, რაც „გურიის ჩაის გზის“ შექმნას გულისხმობს. „გურიის ჩაის გზის“ პროექტი მოიცავს ტურისტული პროდუქტების განვითარებას, ჩაის მწარმოებლების შესაძლებლობების შესწავლასა და მათ გაუმჯობესებას, „გურიის ჩაის გზის“ ასოციაციის მხარდაჭერას და ტურიზმის ინდუსტრიასთან საბაზრო კავშირების შექმნას, რათა რეგიონში ჩაის პოზიციონირება ისევე მოხდეს, როგორც მაგალითად, კახეთში ღვინის. „ჩაის გზის“ მარშრუტი ერთმანეთთან აკავშირებს რამდენიმე სახლის ტიპის სასტუმროსა და მამულს, რომლებსაც გააჩნიათ შესაბამისი მდებარეობა, აწარმოებენ ავთენტურ პროდუქციას, და რაც მთავარია, აქვთ ტურისტების გამასპინძლების შესაძლებლობა. მოცემულ მარშრუტზე მოგზაურობის პროცესში სტუმრებს აქვთ საშუალება დააგემოვნონ ჩაი, მიირთვან ადგილობრივი კერძები და რაც მთავარია, ახლოს გაეცნონ გურული სოფლების ეთნოგრაფიულ მახასიათებლებს.
„ასოციაცია ჩაის გზამ“, რომელიც გურიაში ბახვი ჰესისა და USAID-ის ეკონომიკური უსაფრთხოების პროგრამის მხარდაჭერით ახორციელებს პროექტს, მოიძია 16 მასპინძელი ოჯახი ჩოხატაურის, ოზურგეთისა და ლანჩხუთის მუნიციპალიტეტებში, მოიზიდა დარგის ექსპერტები და მათთან ერთად მოახდინა საჭიროებების იდენტიფიცირება, შემდეგ კი, ობიექტებს ამ საჭიროებებზე მორგებული სერვისები შესთავაზა. მაგალითად, თითოეული ობიექტისთვის შეიქმნა მარკეტინგული გეგმა და ლოგოები, სოციალურ ქსელებში დარეგისტრირდა გვერდები, სამოსახლოები ინტეგრირდნენ სხვადასხვა ტურისტულ აპლიკაციებში, მარკეტინგულად შეფუთეს ტურისტული მიმართულებები, ბენეფიციარებს მოაწესრიგებინეს ტურისტული ინფრასტრუქტურა, რაც სადეგუსტაციო სივრცეების შექმნას ან განახლებას გულისხმობდა, ჩაატარეს ინდივიდუალური კონსულტაციები პროდუქტის შექმნა-განვითარების სრული ციკლისთვის, ასევე, გაუწიეს კონსულტაციები გასტრონომიის მიმართულებით, მოაწესრიგებინეს მენიუები.
ზაფხულის განმავლობაში, აღნიშნულმა 16 ობიექტმა მიიღო ტურისტები და უმასპინძლა მათ ახალ გარემოში, ახალი უნარ-ჩვევების გამოყენებით. პროექტის ფარგლებში მიღებული ცოდნა და გამოცდილება მასპინძელი ოჯახებისთვის ის იარაღია, რომელიც მათ ტურისტების მოზიდვასა და კმაყოფილების ინდექსის ზრდაში დაეხმარება.
„ასოციაცია ჩაის გზა“ მუშაობს გურული ჩაის ბრენდის შექმნაზე, რაც გურული ჩაის საერთო სტანდარტის შემუშავებას გულისხმობს, რომლის ქვეშ მოექცევიან არსებული მწარმოებლები. ეს ინიციატივა მოემსახურება ერთიანი, მაღალი სტანდარტის მქონე პროდუქციის დიდი მასის მობილიზებას, რათა შესაძლებელი გახდეს გურული ჩაის დიდი მოცულობით ექსპორტი.